ഇന്ത്യയുടെ പ്രതിരോധ നിർമ്മാണ മുന്നേറ്റത്തിലെ ഒരു പ്രധാന നാഴികക്കല്ല് അടയാളപ്പെടുത്തിക്കൊണ്ട്, ടാറ്റ അഡ്വാൻസ്ഡ് സിസ്റ്റംസിൻ്റെ ആദ്യത്തെ എയർബസ് C-295 വിമാനം പുറത്തിറക്കി. രാജ്യത്തിൻ്റെ പ്രതിരോധ മേഖലയിലെ സ്വയം പര്യാപ്തതയിലേക്കുള്ള അതിപ്രധാനമായ ഒരു ചുവടുവെപ്പാണിത്. ഗുജറാത്ത് സംസ്ഥാനത്തിൽ വഡോദരയിലെ ടാറ്റ അഡ്വാൻസ്ഡ് സിസ്റ്റംസ് ലിമിറ്റഡിന്റെ (TASL) ഈ പ്ലാന്റ് ഇന്ത്യയിലെ ആദ്യത്തെ സ്വകാര്യ സൈനിക വിമാന നിർമ്മാണ ശാലയാണ്.
ഇന്ത്യൻ വ്യോമസേനയുടെ കാലപ്പഴക്കം ചെന്ന 'അവ്റോ-748' വിമാനങ്ങൾക്ക് പകരമായി 56 സി-295 വിമാനങ്ങൾ വാങ്ങാനാണ് കരാർ. ഇതിൽ 16 വിമാനങ്ങൾ സ്പെയിനിലെ എയർബസ് ഫാക്ടറിയിൽ നിന്ന് നേരിട്ട് എത്തും. ബാക്കി 40 വിമാനങ്ങളാണ് ടാറ്റയുടെ വഡോദര പ്ലാന്റിൽ നിർമ്മിക്കുന്നത്. ടാറ്റാ-എയർബസ് സഹകരണത്തിലൂടെ പുറത്തിറങ്ങുന്ന ഈ വിമാനം ഇന്ത്യൻ സൈന്യത്തിന് നൽകുന്ന കരുത്ത് വലുതാണ്.
സൈനികരെയും ചരക്കുകളെയും കൊണ്ടു പോകുന്നതിനും, മെഡിക്കൽ ഇവാക്വേഷനും, ദുരന്തനിവാരണ പ്രവർത്തനങ്ങൾക്കും ഇത് അനുയോജ്യമാണ്. ചുരുങ്ങിയ ദൂരമുള്ള റൺവേകളിലും താൽക്കാലികമായി നിർമ്മിച്ച മൺപാതകളിലും പോലും ലാൻഡ് ചെയ്യാനും ടേക്ക്-ഓഫ് ചെയ്യാനും ഈ വിമാനത്തിന് സാധിക്കും. 71 സൈനികരെയോ അല്ലെങ്കിൽ 9 ടൺ ഭാരമോ ഒരേസമയം വഹിക്കാൻ ഇതിന് കഴിയും. എന്തുകൊണ്ട് ഇതൊരു നാഴികക്കല്ലാകുന്നു?
ഇന്ത്യയിൽ ഇതുവരെ പൊതുമേഖലാ സ്ഥാപനമായ എച്ച്.എ.എൽ മാത്രമാണ് സൈനിക വിമാനങ്ങൾ നിർമ്മിച്ചിരുന്നത്. ആദ്യമായാണ് ഒരു സ്വകാര്യ കമ്പനി ഈ ദൗത്യം ഏറ്റെടുക്കുന്നത്. സാങ്കേതിക കൈമാറ്റത്തിലൂടെ അത്യാധുനികമായ ഏവിയേഷൻ സാങ്കേതികവിദ്യകൾ ഇന്ത്യയിലേക്ക് എത്തുന്നതിനും പ്രാദേശികമായി വികസിപ്പിക്കുന്നതിനും ഇത് സഹായിക്കും. വിമാനത്തിന്റെ ഘടന മുതൽ ഭാഗങ്ങൾ വരെ ഇന്ത്യയിൽ നിർമ്മിക്കുന്നതിലൂടെ ചെറുകിട വ്യവസായങ്ങൾക്കും (MSMEs) വലിയ അവസരങ്ങൾ ലഭിക്കും. ഇന്ത്യയെ ആഗോള പ്രതിരോധ നിർമ്മാണ ഹബ്ബാക്കി മാറ്റുക എന്ന ലക്ഷ്യത്തിലേക്കുള്ള വലിയൊരു കുതിച്ചുചാട്ടമാണിത്.